Мацi Божая Новага Жыцця, малiся за нас!

Слова “рэкалекцыі” (лац. “recollere”) азначае “збіраць зноў штосці раскінутае” альбо таксама “амаладжвацца, падбадзёрвацца”. Гэта час, калі Вы можаце прысвяціць сябе пераасэнсоўванню свайго жыцця разам з Богам - праз малітву, разважанні і духоўныя практыкі.

У нашай парафіі перыядычна праходзяць духоўныя рэкалекцыі на розную тэматыку. Мэтай рэкалекцый з'яўляецца даць больш паглыбленыя веды пілігрымам пра Бога і Яго законы, дапамагчы кожнаму знайсці надзею ў Богу, Які ёсць Любоў, і магчымасць з Ім прымірыцца праз сакрамэнт споведзі. Аснову нашых рэкалекцый складаюць: тлумачэнне і вывучэнне Святога Пісання (Бібліі), малітва сэрцам, служэнне Найсвяцейшай Панне Марыі.

Удзел у нашых рэкалекцыях пад агульнай назвай “Маё Новае Жыццё” – гэта магчымасць перамяніць сваё жыццё нанова праз Божую любоў, праз ацаленне ранаў і магчымасць назаўжды вызваліцца ад путаў граху.

Рэкалекцыі праводзіць пробашч парафіі - айцец Віталій Цыбульскі, у залежнасці ад тэмы рэкалекцый дадаткова таксама могуць быць запрошаныя іншыя святары ці сёстры законныя. Рэкалекцыі адбываюцца ў аўдыторыі “Дома Пілігрыма” і ўключаюць у сябе таксама Святую Імшу і Адарацыю, магчымасць споведзі і іншыя духоўныя практыкі. На рэкалекцыі абавязкова рэгістрацыя.

Інфармацыя аб бліжэйшых тэмах рэкалекцый будзе размешчана на гэтай старонцы. Сачыце, калі ласка, за нашымі навінамі.